เอเต สตฺต วิหาเร โส, มหลฺลนาคภูปติ;
ปริตฺเตนปิ กาเลน, การาเปสิ มหามตีฯ
[127]
เอวํ อสาเรหิ ธเนหิ สารํ,
ปุญฺญานิ กตฺวาน พหูนิ ปญฺญา;
อาเทนฺติ พาลา ปน กาม เหตุ,
พหูนิ ปาปานิ กโรนฺตา โมหา’ติฯ
สุชนปฺปสาทสํเวคตฺถาย กเต มหาวํเส
ทฺวาทส ราชโก นาม
ปญฺจติํสติโม ปริจฺเฉโทฯ
ฉตฺติํสติม ปริจฺเฉท
ตโยทส ราชโก
[1]
มหลฺลนาคจฺจเยน , ปุตฺโต ภาติกติสฺสโก;
จตุวีสติวสฺสานิ, ลํการชฺชมการยิฯ
[2]
มหาวิหาเร ปาการํ, การาเปสิ สมนฺตโต;
ควรติสฺสวิหารํ, โส การยิตฺวา มหีปติฯ
[3]
มหาคามณิกํ วาปิํ, วิหารสฺส’สฺส’ทาสิ จ;
วิหารญฺจ อกาเรสิ, ภาติยติสฺส นามกํฯ
[4]
กาเรสุโปสถาคารํ, ถูปาราเม มโนรเม;
รนฺธกณฺฑกวาปิญฺจ, การาเปสิ มหีปติฯ
[5]
สตฺเตสุ มุทุจิตฺโตโส, สงฺฆมฺหิ ติพฺพคารโว;
อุภโตสงฺเฆ มหีปาโล, มหาทานํ ปวตฺตยิฯ
[6]
ภาติกติสฺสจฺจเยน, ตสฺส กนิฏฺฐติสฺสโก;
อฏฺฐวีสสมารชฺชํ, ลํกาทีเป อการยิฯ
[7]